[off topic] 高登巴打的炒股心得

純粹少少心得, 不構成任何買賣建議
供有緣模型人參考

序

關於經紀的小故事:

部分經紀會用一個方法去留客,

或者可以咁講, 令到客戶更加信任你, 落更大的盤,

從而過河濕腳

有一百個客, 

經紀向其中50個客話後市睇升, 

再向另一半客戶話後市睇跌

後市升, 結果有一半客戶開始信信地呢位經紀

經紀再向其中25人建議睇升, 另一半人睇跌

之後重覆再重覆.......

該經紀成功為自己建立口碑, 而且亦多左班死忠

第時有咩唔準, 水魚只會覺得係一次半次出錯

而收錯料的客戶, 不論先後, 最多只會被老點一次

對經紀不會有太大怪責..........

如果你要經紀只係負責落盤
上網落盤更加清楚踏實
如果你要意見
是但去問一個唔相關嘅人都係一樣
我睇唔出有咩分別

真正懂股市的人,係最怕向朋友比實質意見的
因為冇人會預計到未來
叫朋友止蝕亦好難講出口
如果個頭止完蝕, 個頭又反彈回升, 咁咪仆街
比完朋友意見, 通常會仲緊張過自己買隻股票......

------------------------------

引言(再序)

如果巴打們從未試過將任何錢投入過股市

我唔期望你會聽得明我講咩

只有真真正正, 拎過自己嘅血汗錢投入股海

經歷過貪婪與恐懼, 希望與絕望,

先會真正明白, 聽得明

以下有一個很出名的股壇故事
作為小弟嘅長文引子

老生常談, 幾乎人人都朗朗上口

大家要將真金白銀投入股海, 

永遠都要記住呢個故事:

古時有個小偷

生了個兒子, 後來兒子長大了

志願竟然是當個小偷!

父親抵不過兒子, 就答應教兒子偷的本事及精髓

公親當晚就帶兒子進入了一大戶人家的寶物庫中偷嘢

就當兒子進入寶庫後, 

父親竟將兒子反鎖在內

然後大叫有小偷有小偷!

兒子當然心底爆哂粗, 老豆搞乜撚嘢!?

戶主, 家丁, 工人全部走出查看有否損失

正當兒子嚇到標尿之際

工人進入寶庫,

兒子立即吹熄工人的蠟燭

趁黑走佬, 中途拎起舊大石拋入池塘

工人家丁們忙於去池塘捉賊

兒子亦得以全身而退

返到屋企, 兒子當然連隔夜的粗口都講埋出黎

父親心平氣和問兒子係點樣成功走佬

父親聽後, 講:

"你已經識得點樣偷嘢, 小偷的絕招不是偷, 而家逃脫的技巧"!

包保各位股友, 每年都會對呢個故事有一個新的體會

------------------------------------------

(1) 基本分析 VS 技術分析

太複雜, 冇用嘅拋書包資訊絕對唔會講,

沒有背後原理支撐的"事實"亦不會講, 

深到自己都要扮明嘅亦唔會講, 廢話少講, 開始

簡單來說, 基本分析就是看財務報表及公司的賺錢能力,

另一方面, 技術分析就是看圖(當然是指股價圖),

什麼是看圖? 我是咁諗的:

1) 由圖看出炒手過去/現在/未來會如何看待呢隻股票

2) 引申出: 小散戶可以從中取利, 鱷口偷金

問題來了, 一個小散戶應該如何看待這兩個炒股方法? (我不會說是投資, 呃到人, 呃唔到自己)

先講基本分析:

市面上, 大部分人, 包括財經台的巴打都非常看重價值投資(即係基本分析)

話學炒股, 就要學最勁的, 就係最著名的巴菲特, 而巴菲特就係價值投資嘅大師云云......

好了, 先不論小散戶有冇"睇通"財務報表嘅能力, 

如果睇報表叻可以發達, 就再冇會計師返工了

事實上, 所有大戶, iBank都會派人到其有份投資的公司長期打躉(例如:可口可樂), 

就算冇專人, 亦有大量線眼,

他們除了能夠知道公司的實際營運能力外, 而且大戶們都手執巨資及權力, 

除了錢, 他們更能夠調度相關的消息及新聞

對, 他們不但控制股價, 更控制新聞, 做左咁多年人, 

大家應該都會發覺好/壞消息都是週期性的, 就像一年四季一樣,

好/壞消息定時定侯就會出現

簡單來說, 他們控制了新聞的發放力度

不太壞的消息可以講成好差, 好消息可以講成不夠好

(當然要強調一點, 垃圾股及妖股一直都不在討論之列)

好了, 重點來了, 即是小散戶可以不理會基本分析?

當然可以, 因為大戶已經為你分析好了, 小散戶應該做, 只能做的任務就是:

跟隨大戶, 鱷口偷金

------------------------------------------

(2) 基本分析

自打嘴巴, 一些最基本的基本分析, 小散戶還是要懂得的

為的是什麼? 不是為了選到好股票, 而是要知道什麼股票不能買, 分清楚什麼是垃圾股及妖股

有人話呢隻P/E低, 抵買, 那隻股票的什麼比率又很低, 又係好很抵買

我只可以講, 報表是非常復雜的, 同樣的數據, 不同行業已經有不同的解釋

單單呢一點, 一般小散戶能夠充分掌握嗎?

講多無謂, 以下說話更能解釋清楚:
市面上的投資軟件, 沒有一款是用業績作為買賣標準的(篩選器除外),

除此之外, 大家亦經常聽到一句:

"過去業績, 不代表未來業績", 冇錯, 報表的公司賺錢能力係上一個季度的, 

甚至連現在的賺錢能力也不能表現出來, 當然, 其公佈一定能夠影響股價表現, 這是後話

不過, 一定有人提前知道消息的, 亦提前表現在股價上, 你想想, 季度業績要請多少人去計? 一定不會走漏風聲?

就算會計師不知, (雖然知道左亦不能夠買, 係犯法的) 

老細自己呢? 老細老婆呢? 老婆的雀友呢? 老細的情婦呢? 老細情婦的老公呢?

這個當然就已經引申到技術分析的層面了

扯得太遠, 回說基本分析, 一般小散戶, 只需要知道三個數據, 

這三個數據, 係連樓下證券行師奶都識的:

1) 市值

2) 流動比率

3) 成交量

*) 資產回報率

*) 股東權益回報率

簡單幾句講完, 市值得幾億的不買, 流動比率太低不買, 日中好少成交的不買

太長了, 下續

------------------------------------------

(3) 基本分析 (續)

1) 市值太低, 從另一方面來估計, 股份未能夠充分分散, 成交亦相對疏落,

莊家很容易便能夠集齊貨源, 將股價舞高弄低, 升時快, 跌時無聲無色, 突然死亡比比皆是

以下係一隻市值一億的股票, 就算未炒過股, 都知道不能夠買吧? 成交疏落, 大上大落, 

完全不能分析

上圖: (1) 是市值, (2) 是當日成交左幾多錢, 睇一睇, 如果我當日買了三萬, 我就係大戶, 能夠令到股價大漲了

2) 流動比率大於1, 即是代表公司能夠立即清還所有債項(如果要的話);

細過1, 即係唔能夠清還所有債項

愈大不代表愈好, 太多代表公司冇好好利用錢去搵錢, 

最好能夠大於1, 小於2 (0.8, 0.9都係可以接受的)

盡量避開作風太過進取嘅公司, 呢類公司, 一有少少壞消息就大大鑊了

*流動比率= 流動資產/流動負債

注意: 流動比率不能用作預測股價的升跌, 

當然, 下面兩圖亦不能代表股價/流動比率是反向關係的, 雖然, 係有少少關係嘅, 你咁勇猛去搵錢喎大佬,

再重複講多次, 作為小散戶, 你係唔能夠估計下一季的業績的:

------------------------------------------

好, 基本分析講完了,

咩話? 完喇? 銀行利率呢? 港匯呢? 格林斯潘呢? (!)

老實講句, 小弟非常清楚國際金融的複雜性, 要靠呢D知識去炒股,

係非常之難, 國際金融, 從來只係談天吹水嘅好材料, 實用性不大 

(頭盔: 對我這個小散戶作用不大)

以上種種, 都只係想強調一個事實, 業績數據, 甚至係環球數據, 小道消息, 國家政策等等........

從來都不是小散戶的好幫手, 如果可以靠數據發達,

炒股就應該是一門科學, 而不是一樣藝術了

為什麼炒股是藝術? 

她充滿了不確定性, 人為因素, 同樣的新聞, 同樣的消息, 下次股價的反應跟上次竟然完全不同,

她只帶給你"似曾相識"的感覺, 這個感覺得來不易, 要擁有這個感覺, 你一定已經交了不少學費

本章以馬丁普林的一句說話作結:

"市場絕不會針對相同事件, 重覆反映同樣的結果" 

Pring,M. (2002) Technical Analysis Explained: McGrawHill

下期預告: 技術分析

------------------------------------------