模型舖行街Guide (太子/旺角/油麻地 ) Ver 2.1 by 柒中之柒

近排冇乜供獻
出番啲舊嘢補數


模型舖行街Guide (太子/旺角/油麻地 ) Ver 2.0

各位同好：

出文後事隔一年多，
有死圖；又有模型舖搬咗，
所以再出過 Update Ver.
補番死圖，同更新一下步行路線及資料等

模型舖行街街旨在同各位分享區內
1. 模型舖；及
2. 製作模型上相關舖頭，例如美勞、文儀、電子等店舖
沿途會加入少量食肆，
以盡量少走回頭路為基礎去行，
希望以最短路程行完大部份地方
方便格價同埋搵心頭好

由於個人力量有限，
如果當中有乜滄海遺珠，
或者隱世好舖，
歡迎各位報料補完
感激！


路線

首先搭地鐵去到太子站
到B2出口





出到地面，右邊係聯合廣場，
行前少少正面係「九龍錶行」，右邊紫色玻璃幕場就係「始創中心」


響「九龍錶行」路口轉左沿水渠道行，


下一個街口就見到「萬寧」

而左邊就係通菜街
就即係大家熟悉嘅「金魚街」一段喇


金魚街除咗有金魚賣之外
其實仲有細砂、草球、枯木等適合造情景用嘅材料
有興趣可以發掘一下

再沿水渠道行下一個街口就係花園街


然後沿路行下一個街口就係洗衣街


右轉入洗衣街

行冇幾耐就會見到今次行街Guide嘅第一站

A. 英明模型有限公司
地址：旺角洗衣街177號


原舊舖135號搬過嚟
算係一間幾齊全嘅模型舖
模型方面：
Bandai、壽屋、田宮、長谷川、Academy、ICM、MiniArt等都有
模型油亦好齊：
Mr Hobby、Gaia、田宮、甚至泡菜品牌IPP都有
而噴槍方面有：
Mr Hobby 同 Sparmax 賣
亦有模型補品例如草粉、飛機木、膠片膠條等

睇完模型，隔離就係一間售賣美勞手工用品公司

B. 手創拾派素材專門店
地址：旺角洗衣街173號地下
網址：http://www.craftsupplies.hk/


呢間舖頭主要售賣美工素材，
例如雪條棒、石膏等
可能有對製作情景需要嘅材料，
可以不妨睇睇

再行前幾個舖位就有另外一間賣美術用品嘅公司

C. 廣益美術用品公司
地址：旺角洗衣街169地下


除咗一般美術用品外，



仲有噴槍賣


再繼續行前少少到行人天橋口(連接新世紀廣場)就係弼街

天橋口就會見到今次旅程嘅另第一間大型美術用品店

D. 專業美術用品有限公司
地址：旺角弼街77號


呢間美術用品公司貨品更齊全，例如：
塑膠彩


自由樹脂(複件用)


Gel Medium


油彩/溶劑


畫筆


等等都可以搵到、值得一睇

而如果你係住新界的話，亦可以坐火車(舊派人始終唔慣叫「港鐵」)到旺角東站，
沿行人天橋到到洗衣街/弼街出亦好方便

沿洗衣街行，過咗旺角道


再行多一個街口就係快富街



行入少少就見到由皆旺地庫搬上地面嘅
E1. RX88 Hobby
快富街37號
網址：http://www.facebook.com/pages/RX88-Hobby/136929293090153


近期亦引入Vallejo水膠彩賣
呢間舖除咗有一般模型用品之外
最特別嘅地方係有LED SMD 等相關零件賣
啱晒想加燈嘅同好
同時佢亦有噴槍套件同抽油箱賣(即係淘寶/Y拍見到果啲)


行番出洗衣街
就到咗另一間老牌模型舖

E2. 千里達玩具模型公司
地址：旺角洗衣街127A地下


雖然舖面冇同英明咁大
但都同英明一樣有齊大部份類型嘅模型
亦有一啲田宮遙控車配件賣，
工具同補品亦有售
噴槍主要賣 Badger、田宮
唯一唔及英明就係冇咁多模型油賣同冇咁齊

出咗千里達之後，
再一直行到亞皆老街口，
就係皆旺商業大廈/皆旺商場

F. 皆旺商業大廈/皆旺商場


洗衣街門口係商業大廈；亞皆老街門口係地庫至三樓商場
而商業大廈其中一條電梯係通各層包括地庫
先上21樓

富聯原料有限公司
地址：皆旺商業大廈21樓
網址：[url]http://www.newlink.iyp.hk/[url]



可以話係模型界聖地
有齊各種刁鑽工具、用品、補品



亦有各種模型教學書籍
只係模型油唔夠英明齊
(不過人哋唔係主力賣模型油而係用具)
係模型友一個不可錯過嘅寶地

而隔離係肥青蛙模型


只開星期六
不才有「幸」睇過一次
有人像同跑車(成品？)及水貼賣
睇唔睇到就真係要點緣份.....


而商場入面亦有好幾間舖係有小量模型、首辨、人形、代砌等
但有啲係好晏先開，
不才唔響度逐一介紹喇
各位可以在此慢慢尋寶








直得一提係3樓有角落舖位有間賣軍事參考書籍

裡面有大量英文軍事參考書籍，
老細亦好Nice歡迎任睇，
對軍事有興趣的話可以睇睇

路線(續)


行完皆旺之後，
就過對面馬路然後轉左行到染布房街(即火車橋)


然後沿染布房街一直行....


直到廣華街口轉右


就見到另一間模型舖

G. 生暉模型
地址：旺角廣華街23號地下


除咗模型外亦有工具同補品賣
據聞老細好鍾意砌船


而響生暉隔離
就係由原登打士街新搬過黎嘅

H. 環球模型 UML Hobby館
地址：旺角廣華街15-33號
網址：http://www.universal-models.com/


環球主要係賣軍模多，
高達比較少，
除咗常見嘅田宮、長谷川呢啲日系老牌外
亦比較多外國品牌例如 Affix、Itallia等
當然唔少得獨家嘅龍記
地方比以前登打士街有兩層比就細好多....


行完UML Hobby館點可以唔行埋佢嘅本舖呢？

暫時行番出廣華街先
去番火車橋過馬路


過咗火車橋底之後就會到


I. 環球模型 UML 本舖
地址：旺角窩打老道63號地下
網址：http://www.universal-models.com/


模型貨色當然同hobby館一樣


咁點解要特登行過黎呢？
原因係2樓有大量參考書刊同埋有獅鳴PE賣


順帶一提：UML係唯一一間可以開盒睇模型嘅舖頭

行完UML本舖之後，
行番轉頭反方向沿窩打老道行(向番廣華醫院方向)


行冇幾耐就係
J. 宏記模型
地址：旺角窩打老道35A地下


雖然係田宮其中一間代理，
但都有其他如小號手及Hobby Boss模型賣
而田宮油響呢區黎講算最平


再繼續沿窩打老道行到登打士街口轉入去


再轉右行番入廣華街


行冇耐就係
K. 偉利模型中心
地址：旺角廣華街14號地下


偉利模型亦係一間老牌模型舖，
港九都有佢分店，
都唔使多介紹，
賣嘅種類同英明差唔多

偉利對面一帶就係所謂「槍街」，
因為有好多氣槍軍事品等舖頭，
當中亦有唔少RC舖，
可惜不才唔太熟，
所以唔多講喇


而
L. 仁安大廈商場


下面嘅商舖


有幾間賣模型及用品嘅舖頭



而呢間仲有模型課程上


行完廣華街就可以沿登打士街行番出彌敦道，

沿途有好多小食檔可以醫肚


而呢間「肥姐」鹵水永遠係人龍王


行到出人山人海嘅彌敦道轉右就係
M. 信和中心


信和地庫有 「animate」

同2樓「精品」模型舖


路線(續)


行完信和中心，
向油麻地方向行
行到碧街口轉左


直行到東方街口轉右


就見到
N. 偉高模型
地址：油麻地東方街7-8號


主打遙控模型，但都有雙星模型同模型油賣
價錢同宏記一樣
sorry 手震影到鬆郁濛



行完可以直出番窩打老道再轉左出彌敦道，
過馬路後再沿彌敦道向油麻地方向行


過咗窩打老道....


行多一陣就到
O. 中南廣場
地址：旺角彌敦道503號


中南係區內數一數二嘅大型文具公司
今次主要係介紹3樓美術用品，
同太子區美術用品公司一樣非常齊全



連草粉


同 Iwata 噴槍都有


睇完中南繼續南行彌敦道，

過咗文明里


下個街口就係永星里


轉入去就見到
P. 利廣模型公司
地址：油麻地廟街36-40號永星大廈地面A鋪
網址：http://www.leekwon.com.hk/


呢間舖主要係賣火車模型
火車迷應該識



路線(續)


睇完火車出番黎彌敦道，
再繼續向佐敦方向行

過咗眾坊街


甘肅街


之後就係北海街(即永安百貨)



轉右就係今日最後一站
Q. 康田模型公司
地址：油麻地彌敦道345號永安九龍中心地下G14舖(由北海街入)


康田應該油麻地區內唯一模型舖，
主要都係以賣軍模為主，
有唔少強國出品軍模賣，
最重要係區內得佢一間有 Vallejo、AK、Life Color等呢類模型油賣，
所以又係模型友必去嘅好地方

一口氣行完三個區
真係好攰
一於行番去橫綱食個拉麵先