1/700 山城 (4) by Windstoss

終於搞掂咗山城嘅甲板分色，做之前真係冇諗過工作量會咁大。
明春書上面講咗兩三頁嘅內容足足搞咗我近三個禮拜。

甲板分色要做嘅事其實就係將約7m 嘅Aizu 0.4mm 遮蓋帶cut 做7mm 一份，然後重複遮蓋噴色嘅工作。
而我用嘅顏色依次序係 XF-78, XF-59, XF-60 同XF-49 (冇百度模型船吧上面個教學用咁多色)。




▲ 噴完XF-78 後開始做亂數遮蓋。


▲ 之後係XF-59。


▲ 最後噴完XF-49 之後嘅樣，甲板大部分地方都已經黐滿哂遮蓋帶。





▲ 搣完遮蓋帶之後嘅效果，遲啲洗埋甲板效果應該會仲好。



▲ 呢條好礙眼嘅甲板接縫就係我做甲板分色嘅原因，做完分色後近睇仲有啲破綻，但遠睇已經唔覺有問題

P.S.1
遮蓋帶要用先cut 出嚟，唔好一早準備好哂，事關呢個世界上有樣野叫灰塵。
當初我一早黐好哂二十幾段長2x cm 嘅遮蓋帶係cutting mat 上面，雖然我停工時已經係張到cutting mat 嘅面上面用幾張A4 紙遮住，但後期我依然發覺超過七成嘅遮蓋帶上面都黐咗毛毛，黐上甲板前要用另一把鑷子，一條一條咁搣走佢哋先繼續作業...

係無塵房工作嘅巴打可以無視呢一點。

P.S.2
搣遮蓋帶時明春會教你用比較闊嘅遮蓋帶一次過扯哂啲細膠帶落嚟。
啱，但係啱唔哂。因為啲細遮蓋帶黐力都幾強下，我跟佢方法用力壓條闊遮蓋帶落去都只係可以扯到一、兩成嘅細膠條落嚟。
最後我嘅做法係用鑷子鏟鬆哂啲細膠條然後先用闊遮蓋帶扯佢哋落嚟。鏟嘅過程要小心啲，否則會連的漆都鏟走埋。

1/700 山城 (5) by Windstoss
1/700 山城 (vol 3: 煙囪) by Windstoss